ताटात अन्न टाकून दिल्यास ग्राहकाला 300 रुपये दंड

लंडन । स्वित्झर्लंडमधील एका रेस्तराँने अन्न वाया जाऊ नये यासाठी नवीनच शक्कल लढवली आहे. ताटात अन्न टाकून दिल्यास या रेस्तराँमध्ये ग्राहकाला 5 फ्रँक (सुमारे 338 रुपये) दंड ठोठावण्यात येणार आहे. भरमसाठ ऑर्डर करून अर्धवट जेवणारे अथवा ताटात अन्न टाकण्याच्या सवयीला यामुळे आळा बसेल, असे रेस्तराँच्या मालकाचे मत आहे. स्वित्झर्लंडमधील तिसीनो राज्यातील लोसोन शहरात पॅत्रिझिता हे रेस्तराँ आहे. या ठिकाणी ताट स्वच्छ करणे अनिवार्य आहे, अन्यथा ग्राहकाच्या बिलामध्ये पाच फ्रँक अधिक लावले जातात, असे वृत्त 20 मिनिट्स न्यूजपेपर या दैनिकाने दिले आहे. सोमवारपासून ही पद्धत रेस्तराँमध्ये अंमलात आणली आहे. गिओवानी ताफु रो यांनी एप्रिल महिन्यात हे रेस्तराँ खरेदी केले होते. रेस्तराँमध्ये लंच टाइम बुफेमध्ये अन्न प्रचंड प्रमाणात वाया जाते, असे त्यांच्या लक्षात आले. ( दिव्य मराठी दि. १२/०५/१४ )