बोले तैसा न चाले, त्याची ……     माजी राष्ट्रपती दिवंगत डॉ. ए.पी.जे. अब्दुल कलाम यांच्या स्मरणार्थ यापुढे कोणत्याही शासकीय कार्यक्रमात बुके (पुष्पगुच्छ) देता त्याऐवजी बुक (पुस्तक) देण्याचा निर्णय भाजप सरकारने घेतला. नुकत्याच झालेल्या हिवाळी अधिवेशनात शिक्षणमंत्री विनोद तावडे यांनी हा निर्णय जाहीर केला होता. प्रत्यक्षात याच पक्षाच्या नेत्यांनी स्वत:च्या निर्णयास तिलांजली दिल्याचे शुक्रवारी चिकलठाणा येथे झालेल्या महामार्गाच्या भूमिपूजन सोहळ्यात दिसून आले. केंद्रीय मंत्री नितीन गडकरी यांच्या उपस्थितीत झालेल्या या कार्यक्रमात प्रत्येक पाहुण्यासाठी भला मोठा पुष्पगुच्छ आणण्यात आला होता. प्रत्येकाचे तो देऊनच स्वागत करण्यात आले. कार्यक्रम सुरू होण्यापूर्वी पुष्पगुच्छांचा खच एका रांगेत लावण्यात आला होता. तर कार्यक्रम संपल्यानंतर हे पुष्पगुच्छ सभामंडपात ठिकठिकाणी विखुरलेले होते. काही नेत्यांनी ते सोबत नेले तर काहींनी तेथेच ठेवून दिले. थोडक्यात, महामार्ग प्राधिकरणाने केलेला खर्च असा वाया गेला. बुकेऐवजी जर बुक दिले गेले असते तर कदाचित वेगळे चित्र दिसले असते अन् राज्य शासनाने घेतलेल्या निर्णयाची आम्ही लगाेलग अंमलबजावणी केली, असे ही मंडळी सांगू शकली असती. त्यामुळे भाजपच्या करणी कथनीत फरक तर नाही ना, अशी शंका अनेकांनी घेतली. (सविस्तर बातमी आजच्या दिव्य मराठी मध्ये)