स्वाभिमान मीराकुमार यांचा 

 सद्ध्या गाजत असलेल्या देवयानी प्रकरणामुळे अमेरिकेची मग्रुरी दिसून येते. आपण जगाचे पोलिस व न्यायाधीशही आहोत असा अमेरिकेचा समज आहे व  जगात चाललेल्या घडामोडीत हस्तक्षेप करणे हे आपले आद्द्य कर्तव्य आहे अशा थाटात अमेरिकेचे वागणे असते. यापूर्वी भारताचे माजी  राष्ट्रपती माननीय ए पी जे अब्दुल कलाम व एडीए या 'प्रखर राष्ट्राभिमानी' राज्यकर्त्यांच्या कारकिर्दीत तेंव्हाचे भारताचे सरंक्षण मंत्री स्व. जॉर्ज फर्नांडीस यांना फारच लाजिरवाण्या अंगझडतीला सामोरे जावे लागले होते. तेंव्हा आमच्या सरकारांनी हा प्रकार निमुटपणे सहन केला होता. 

या पार्श्वभूमीवर  काही महिन्यांपूर्वी प्रसिध्द झालेल्या एका बातमीकडे मात्र सगळ्यांचे  दुर्लक्ष झालेले आहे. खरे पाहतां सध्याच्या देवयानी प्रकरणाच्या पार्श्वभूमीवर पत्रकार जगताने ह्या बातमीला प्रकर्षाने उजेडात आणावयास हवे. ती बातमी अशी . लोकसभेच्या सभापती सुश्री मीराकुमार ह्या अमेरिकेच्या दौऱ्यावर जाणार होत्या.  दौऱ्यावर निघण्यापूर्वी सभापतींच्या कार्यालयाने अमेरिकन प्रशासनाला अशी विचारणा केली की मीराकुमार यांची सुरक्षा तपासणी केली जाणार आहे काय? सुरक्षा तपासणी केली जाईलच असे अमेरिकन प्रशासनाकडून उत्तर आले तेंव्हा मीराकुमार यांनी आपला अमेरिकेचा दौराच रद्द केला. केला. 

यापूर्वी ज्या मान्यवरांची सुरक्षा तपासणी करण्यात आली, त्यांना आपला अमेरिकेचा दौरा तत्काळ रद्द करून  विमानतळावरूनच स्वदेशी परत येता  आले असते व आपल्या अस्मितेचे प्रदर्शन करता आले असते. काही मंडळी, आपण एखाद्या दुसऱ्या  देशात असतांना त्या देशाचे कायदे पाळायलाच हवेत, अशी लंगडी सबब पुढे करतीलही पण दुसऱ्याचा मान ठेवतांना आपण आपल्या  अस्मितेशी मुळीच तडजोड करू नये हे साधे सूत्र पाळण्याचे भान मात्र नक्कीच ठेवायला हवे. मीराकुमार यांनी ते ठेवले याबद्दल त्यांचे अभिनंदन करावयास हवे.

राजेंद्र कडू ,

rajendra.kadu02@gmail.com